係咪覺得呢牌霹啪959好似無乜我哋主持人嘅 update 呢？其實係因為我哋有好多好多 events 正在發生緊，尋晚去完一間教會做 Jubilization，今晚 Annual Dinner，聽日開始一連三日去 Camp... 另外仲有我哋嘅執行董事主席 Alfred Lam 同埋總幹事 Gabriel Chan 喺多倫多遠道而嚟呢！所以只係因為大家都非常忙，未得閒同大家 Update我哋嘅情況啫，唔駛擔心！

雖然好多嘢做，不過都想同大家分享一下前一牌一個都幾特別嘅經歷：

話說，我哋使者協會嘅「雀躍者」敬拜讚美隊每個月都會有Gathering嘅。咁有一個星期，我去咗呢間果菜店買菜，煮飯俾大家食吖嘛。

到俾錢嘅時候，因為我無Cash，所以就俾 Credit Card 囉。點知佢部刷卡機碌極都碌唔到，就算我俾其他卡佢碌，佢都話有 error。終於攪到要個好似 Manager咁樣嘅人嚟搞，但係始終都係搞唔掂。

啲菜又入哂袋，乜都攪掂，只係差末俾錢。本來以為佢會叫我去ATM攞錢啦，點知個 Manager 話：

「得啦，你聽日先番嚟俾錢啦。」

...... 吓？

話就話我唔係買咗好多菜，不過都成7個幾㗎！竟然今時今日嘅溫哥華，一間打開門做生意嘅鋪頭，都仲會有呢種香港六、七十年代嘅信任同埋人情味！

只見收銀員已經繼續為其他顧客服務，我就攞住價值7個幾嘅菜，無俾錢，就走咗嘞。

至於我之後有無返去俾番錢？你估吓！

... 乜我似啲貪小便宜周圍扼飯食嘅人咩？梗係有啦！

不過我去同個哥哥仔講，話我想俾返尋日張單啲錢嘅時候，佢都覺得有啲不可思議，仲講咗句：「吓？咁都得？」

當你在沒有預計之下得到如此這般厚待嘅時候，真係只能衷心講一句：

恩典實在太美麗！